MPONIN’ANDILAMENA

Ankoatra ny fahasahiranam-bahoaka izay efa mihoatra ny loha mantsy dia mbola vesatra hafa ihany koa ny tsy fahafahan’ny sasany manatanteraka ny asa fivelomany vokatr’izay fahatapahan-jiro matetika izay. Ho an’ireo mponina ao Andilamena, Faritra Alaotra Mangoro dia voatery nivoaka ny trano nitokona nilanja sora-baventy mihitsy izy ireo, omaly Alarobia 20 Martsa. Efa andro maromaro mantsy izao no tsy nirehitra intsony ny jiro any an-toerana. Mirongatra ihany koa ny tsy fandriampahalemana vokatr’izany raha vantany vao maizina ny andro ka anisan’ireny ny fanendahana sy ny fanaovana sinto-mahery. Nanambara moa ireo mponina ao Andilamena fa efa ela izy ireo no nampandre ny orinasa JIRAMA saingy tsy mbola nisy vahaolana hatreto. Miantso ny Fitondram-panjakana mba hijery akaiky ity delestazy tsy misy farany ity araka izany izy ireo. Nomarihin’ireo mponina moa fa tsy hitsahatra ny fitakiany raha tsy miverina mirehitra ny jiro.
Pati
Legende : Tezitra tahaka izao ny mponina dia nivoaka ny trano nilanja sora-baventy !