Actualités

Anisan’izany ilay pastera avy amin’ny fiangonana zandriny iray nahavita nanolana ireo tovovavy kely mpino ao aminy ka efa naiditra am-ponja vonjimaika. Naneho ny heviny mifandraika amin’izany pastera Heritiana Randriarimalala, tompon’andraikitra voalohany eo anivon’ny trano fivavahana Vahao ny oloko, omaly. Nambarany fa tokony hitandrina hatrany ny mpino. Olombelona nofo aman-dra ihany mantsy ny pastera hoy izy ka mety ho latsaka indraindray. Na izany aza anefa dia notsindriany ihany koa fa misy ireo ambodia mitafy hodi-janak’ondry. Tsy tena pastera hoy izy fa misandoka fotsiny ka ilana fitandremana. Miantso ny mpino rehetra mba hahay hanavaka tsara ny vary sy ny tsiparifary araka izany ny tenany hialana amin’ny fitaka. Marihina hatrany moa fa ambonimbony kokoa noho ny an’ny olon-tsotra nanolana ny sazy mahazo ireo heverina ho Ray aman-dReny manolana ireny. Tafiditra ao anatin’izany ny pastera….izay marihina fa olona tokony hanabe sy hanome maodely tsara nefa manararaotra sy mamotika ny fiainan’ny hafa.
Pati