Actualités

Tsy misy ifandraisany satria tamin’ny 2012 ny fanavaozana farany. Ezahina ampifandraisina, kanefa tsy misy ifandraisany”, hoy ny Sekretera Jeneralin’ny Minisiteran’ny Fitsarana niezaka naneho fa tsy misy ifandraisan’ny amin’ny raharaha politika mihitsy ny tetikasa PRODIGY (Projet de gouvernance Digitale et de gestion de l'Identité MalagasY). Any amin’ny tapany Atsimo Atsinanana sy ny tapany Avaratry ny Nosy tahaka an’I SAVA no hanombohana azy, izay efa nisokatra nanomboka ny 01 septambra. Tsy araka ny hoe: hisy ny fifidianana, dia manenjika 3 tapitrisa, hapetraka ny “guichet unique”, tombony ho anay satria asanay andavanandro. Fanafainganana ilay asam-pitsarana ilay izy, hoy io tompon’andraikitra ambony io. Tsara anefa ny mampahatsiahy, fa ny 9 septambra ny dia nanambara ny sendikan’ny Mpitsara eto Madagasikara na ny SMM fa hampiato an’io aloha satria maro ny zavatra tsy mazava sy ny pitsopitsony samihafa. Nanaraka izany ihany kosa ny sendikan’ny mpiraki-draharaha, ary na efa nisy aza ny fanapahana tao anatin’ny Filankevitry ny Minisitra vao tsy ela fa homena tambin-karama ireo rehetra mandray anjara amin’io tetikasa io izay miisa 29805 dia tsy mampihetsi-bolomaso azy ireo, izay nanipika fa tsy nahafaly azy ireo ny vava nataon’ny Minisitera hoe: raha ady no ilaina dia vonona, ka tahaka tsy tahaka ny Raiamandreny sy zanaka intsony. Manamafy ny fitakiany hatrany amin’ny 2012 momba ny fijerena ny satan’izy ireo. Momba ity tetikasa ity, nilaza io Sekretera Jeneralin’ny Minisitera io, fa efa misy ny fifampiantsoana, fifandresen-dahatra atao amin’izao fotoana izao. Isan’andro misy ny fifanatonana. Raha miteny ny sendika hoe: tsy hanatanteraka izany, dia miantso ny mpitsara hoe: aza atao takalon’aina ny vahoaka. Misy ireo manao, ireo tsy manao kosa amin’ny maha sendika dia zon’izy ireo. Lasa resaky ny moana sy ny marenina ve?
Toky R