Serasera momba ny fahatapahan-drano

Santionan’ny resaka teny amin’ny tambazotran-tserasera sy teny amin’ny fiarahamonina rehetra teny izany tamin’iny faran’ny herinandro. Ny anay efa tapaka foana na misy na tsy misy filazana, hoy ny sasany. Tsy hita akory izay akony, hoy ny hafa. Inona tokoa moa izany izao no mba fivoarana nentin’ilay serasera momba ny fahatapahan-drano teo amin’izay lafiny famatsiana rano izay, indrindra, ho an’ireo fokontany sy kaominina ary boriboritany malaza ho efa mpijaly amin’izany teo aloha teo raha tsy hitanisa fotsiny afa-tsy ny eny Itaosy na ny eny amin’ny boriboritany faha 5 eny ohatra? Toy izany koa ity olan’ny herinaratra ity. Rahoviana ihany no tena ho tonga ny vahaolana maharitra sa ho vokisana serasera sy sarisary toy ny hatramin’izay 5 taona lasa izay hatrany indray aloha ny vahoaka mandritr’izao 5 taona hoavy izao? Ho hita eo izay ho afitsok’ireto governemanta vaovao.
J. Mirija