Tahina Razafinjoelina

Manoloana izao zava misy eto amin’ny firenena izao dia maro be ny olona misaina hoe “andao atao izay mbola tsy natao fa izay no tsy nahatafita”. Nahitsy i Tahina Razafinjoelina Filohan’ny Firaisankinan’ny Tia Tanindrazaa naneho hoe hevitra fa tsy mety izany satria ny mila jerena ny lesoka sy ny vahaolana. « Tsia, aza vonoina ho faty ny zanaka rehefa maditra satria hoe tsy mbola natao mihintsy izany. Aleo jerena ny antony mampaditra azy dia izay no amboarina. » Misy, hoy izy, mitady hiverina hatrany am-boalohany mihintsy, angamba ho foanana koa ny finday sy ny akanjo ka hiverina hisalaka satria sao ireny no napahantra antsika? Eny, hatramin’ny finoana ary dia tadiavintsika ho foanana fa izany no heveritsika napahantra. Firifiry nefa ireo firenena mino nefa tafita? hoy hatrany ny tenany. « Amin’ny maha antoko politika anay dia nodinihinay teo anivon’ny antoko io ary ny antony lehibe indrindra mapahantra antsika dia isika Malagasy manjifa kokoa fa tsy mamokatra eto amin’ny tanintsika. Noho izany dia betsaka ny vola mivoaka nohon’ny vola miditra. Izay no antsoina hoe fahantrana. », hoy hatrany i Tahina Razafinjoelina. Andao, hoy izy, hatsaraina ny fanabeazana hitodika bebe kokoa amin’ny fahalalana ny firenentsika ahafahantsika Malagasy miasa sy mivelona eto amin’ny tanintsika. Ny hafa ve tonga eto hila ravinahitra dia isika maika hiala? Andao hamoraina ny sehatra ahafahan’ny Malagasy miditra amin’ny tsena iraisam-pirenena mba hampidirana vola vahiny. Andao ho aparitaka manakaiky ny mpamokatra ny volam-panjakana fa tsy ajanona anaty birao, hoy i Tahina Razafinjoelina izay manamafy hatrany fa ny fanabeazana, ny fanapariahana ny fahefana sy ny volam-panjakana, ny nomerika no anisan’ny fanalahidy lehibe hivoahan’ny Firenena amin’ny fahantrana.
Toky R