Politique

Fotoana izao, hoy ity filoha ity, hitsofana anjomara hitondrana rivo-baovao hampiraisana indray ny malagasytaorian’izay am-polo taona maro nibahanana olona 2 na antoko 2 na vitsivitsy ny fitantanana ny firenena izay. Rivo-baovao hitondra fomba fanaovana politika hahafahan’ny rehetra miaina ao anaty fahalalahana sy fahafahana. Antoko politika hitarika fanafahana amin’ny fahaizana sy fitaizana olompirenena vanona, hanaja sy hampanaja lalana, hiahy ny tanindrazana sy tia tanindrazana, hanome lanja ny maha olombelona satria ny olombelona no loharanon-karena, hametraka lamina mati-paika hitantanana ireo harem-pirenena. Handrotsaka kandida amin’ny fifidianana rehetra ny ARB. Haka fahefana amin’ny alalan’ny fifidianana madio sy mangarahara no antom-pisian’ny antoko politika. Tsotra ny vina dia ny hanaisotra ny boky efa teo fa hanokatra boky vaovao. Misy ny fifampiresahana amin’ny hery politika hafa na vondrona politika hafa. Iray iraisana ny fampandrosoana ny firenena dia miaraka izahay fa raha misy tsy mifanaraka amin’ny vinan’ny antoko dia tsy miaraka izahay. Ekena ny voka-pifidianana raha tsy misy fangalaram-bato. Raha misy fangalaram-bato kosa, aleo hanandrana dia ho hitantsika. Ny tohin’ny asa moa dia tsy maintsy hanao ny kaongresim-paritra raha tsy misy ny sakantsakana. Kaongresy nasionaly atao eto Antananarivo no ao aorian’izay, hoy hatrany ny tenany.
J. Mirija