Antoko politika MMM “Anananay porofo fa mbola mandray anaran’olona ny CENI”

Nohitsin'ny mpitondra tenin'ny MMM, Rakotomalala Rija, ny fihoaram-pefy ataon'ity rafitra mpikarakara fifidianana ity. Tokony hanara-dalàna ny Ceni. Tsy voahaja anefa izany. Heno sy hita ary anananay porofo fa mbola mandray anaran'olona amin'ny lisitry ny mpifidy izy ireo izao, hoy izy. Mbola misy olona mameno ny lisitra anaty karne sy mandray anarana any nefa efa tapitra ny fe-potoana tokony hanaovana izany fa efa eny anivon'ny fokontany indray izao no tokony handraisana izany, hoy hatrany izy tetsy Analakely omaly. Hiantraika amin'ny fikarakarana lisi-pifidianana sy ny fifidianana izany. Tafiditra ao anatin'izany ny fifidianana filoham-pirenena sy ny eny anivon'ny kaominina. Etsy andaniny, olana efa napetrak'izy ireo koa ny fikirakirakana ny rindram-baiko amin'ny fampidirana ny anaran'ny mpifidy anaty solosaina hiatrehana ny fifidianana roa samihafa. Nokirakirain'izy ireo samirery tao izany ary tsy nanaovana fanadihadiana na "Audit" ilay rindrambaiko ahafahana mijery ny anarana miverimberina na "doublon" na misy tokoa na tsia. Tsy manaraka ny fenitra anefa io fitaovana io, hoy ihany izy. Notsiahivina avy eo fa 37% ny tahan'ny isan'ny mpifidy ny volana desambra teo ary nambara kosa ny janoary teo fa maherin'ny 9 tapitrisa izany izao. Mbola mitady mpifidy hatrany amin'ny 4 tapitrisa mahery izany ny Ceni, vao hahatratra ilay mpifidy 13 tapitrisa. Efa tsy tomombana hatramin'ny voalohany io. Takinay MMM ny mba hanampian'ny fanjakana ny hampanarahana fenitra eo amin'ny fitaovana, ny vola ary koa ny olona, afahan'ny Ceni manao ny asany, hoy hatrany ny MMM.
J. Mirija
Legende: Rija Rakotomalala