Politique

Fotoam-bavaka lehibe ho fangatahim-pitahiana ho an’ny firenena no hanokafana izany rahampitso Alarobia 07 Jona izay vavaka iraisam-pinoana raha araka ny fanazavan’ny Ben’ny tanàna Raharinoasy Elie Dominic. Hitohy amin’ireo hetsika ara-toekarena sy ara-tsosialy maro samihafa izany ho fanomezana fahafaham-po ny mponina raha efa mandeha kosa ny fifaninana ara-panatanjahantena toy ny lalao baolina kitra ho an’olona miisa 9. Ho an’ity farany manokana dia ireo Fokontany 12 isa mandrafitra ny kaominina no indray miara-mandray anjara amin’izany ahitana sokajy telo dia ny ankizy, ny tanora ary ny olon-dehibe. Hisy ny koa ny didim-poitra faobe izay tsy handoavam-bola fa maimaim-poana ho an’ireo zazalahy kely rehetra mbola tsy voafora ao anatin’ny kaominina. Arahin’ny Ben’ny tanàna fizarana kilalao sy vatomamy ho azy ireo izany entina hanalana fahasahiranana ny Ray aman-dReny. Tsy latsa-danja amin’ireo ny fizarana solombody akoho ho an’ireo zokiolona sy sakafo ho an’ireo sahirana. An-jatony ireo hisitraka izany mandritra ny andro maromaro raha tsy hohadinoana ihany koa ny fisian’ilay foara-bokatra lehibe entin’ireo tantsaha mpamokatra hampirantiana sy hampahafantarana ireo vokatra novokariny nandritra ny taom-pambolena iray. Hofaranana amin’ny matso lehibe handraisan’ireo fikambanana sy sekoly maro samihafa anjara ny lanonana ny datin’ny 25 Jona, arahin’ny Ben’ny tanàna fanaovana tatitra mikasika ny asa vitany mba tsy ho tompon-trano mihono ny vahoaka.
Pati