Politique

Raha efa somary nangingina iny resaka nampiady hevitra iny, dia nofohaziny indray. Tahaka izao ny nambarany, izay haverina eto ahafahan’ny olom-pirenena mamakafaka tsara hoe: hatraiza ny fahamarinan’ny ambarany sy ny zava-misy manjo ny firenena: “…Izaho ihany koa mba “Champion”, “champion de l’industrialisation en Afrique”, ary eto aho no manazava azy amin’ny vahoaka Malagasy hoe: tsy iadian-kevitra akory ny maha “champion” ahy izany. Matoa ianao “champion” izany dia misy antony, ary tsy adala ny olona miteny anao hoe: ianao no “champion”. Raha fintinina hoe: inona no naha “champion de l’industrialisation” ahy dia mba zaraiko aminareo ihany sy ho an’ny vahoaka Malagasy, ny naha “champion” antsika Malagasy sy ny tenako dia ny fanananana vina na “vision” hoentina mampandroso ny firenena, ny fanananana planina na “plan” hoe: ahoana no hampandrosoana ity firenena ity, ary indrindra ny fanananana “strategie”, izay no zava-misy!... Talohan’ny naha “champion” amin’ny filoham-pirenena ny tenako, ny Filohan’I Senegal Macky Sall no “champion” noho ny fananany ny “Plan pour l’émergence” an’I Sénegal izay nanaovany tanàna vaovao, indostria maro be. Talohan’I Macky Sall dia ny Filohan’I Côte d’Ivoire, izay miakatra be ny harin-karena faobe (PIB) an’izany ankehitriny, ary talohan’izany dia ny Filohan’I Ghana. Firenena matanjaka daholo ireo, izay isika Malagasy vao “champion”…!”, hoy I Andry Rajoelina. Zary lasa ataon’ny olona fihomezana ny Filoham-pirenena, raha tarafina amin’ny setrin’io amin’ny tambajotran-tserasera! “Champion de la nullité”, hoy ny sasany, “champion” amin’ny lainga sy ny abobo, hoy ny hafa, ao ny miteny fa “champion” amin’ny makety, misy ny maneho fa tompondakan’ny fanondranana harem-pirenena?, “champion” amin’ny fitantarana angano hoy ny sasany,… Tena mifanaraka amin’ny maha tompondaka azy ve ny toekarena sy ny sosialim-bahoaka. Maneho ny Filoham-pirenena fa ny fananany vina sy planina hoenti-mampandroso ny firenena, kanefa vina sy planina poakaty raha jerena amin’izao zava-misy izao. Mampitaha hoe: nanana ny “Plan pour l’émergence” I Senegal dia niakatra be ny harin-kareny fa Rajoelina mba nanana ny IEM (Initiative pour l’Emergence de Madagascar) fa aiza isika izao? Moa nisy vola nanatanterahana azy? Ny azo hamehezana azy dia toa mitoetra ilay fanasokajiana nataon’ny vazaha tamin’ny andron’ny tetezamita hoe: tsy misy kalitao.
Toky R