Marc Ravalomanana

filoham-pirenena malagasy teo aloha, Marc Ravalomanana, nanehoany ny heviny mikasika ny fepetra noraisin’i Madagasikara manoloana ny olana ao Israely sy Palestinina. Ny 12 septambra teo, hoy izy, dia namoaka fanambarana iombonana niezinezina ny fivoriamben’ny firenena mikambana. Niainga tao New York ny fankatoavana ny vahaolana iraisan’ireo firenena miisa roa voalaza ireo mba hiainan’izy ireo an-kalalahana sy anaty fandriampahalemana. Firenena miisa 142 no nanaiky izany. 10 nanohitra. 12 tsy naneho hevitra. Firenena afrikanina miisa 4 ihany no tsy niandany dia i Guinée-Bissau, Liberia, Bénin ary i Madagasikara. Ho an’ny firenena mikambana anaty SADC dia samy nandray andraikitra nanoloana ny fanapahan-keviny ny ankamaroany. Nanaiky i Afrika atsimo, Angola, Mozambika, Zambia, Tanzania, Zinbabwe, Namibie, Botswana, Seychelles, Lesotho, Malawi, Maorisy, Kaomoro. Tsy niditra i RDC. Madagasikara ireny no nisafidy ny hangina. Fahanginana izay tsy midika ho tsy fiandaniana fa fahadisoana. Fahadisoana ara-moraly izay manome lamosina ny vahoaka palestinianina ao anatin’ny fotoana hitadiavany fankatoavana iraisampirenena. Adisoana afrikanina izay nandà ny fahazarana miray hina eo amin’ny samy afrikanina sy ny lovan’i Bandung, izay nitondra hatrany ny feom-bahoaka marefo. Fahadisoana ara-diplaomatika, izay mametraka an’i Madagasikara ho isan’ireo firenena voafafa, tsy mahasahy mandray andraikitra amin’ny safidiny. Sarotra ve nefa izany? Manana ny tantarany i Madagasikara. Hainy hatramin’izay ny mankato ireo fomba fijoro iraisan’ny rehetra dia ny fahafahana, ny fiandrianam-bahoaka, ny firaisankina. Voahitsakitsaka izany lova izany ny 12 septambra teo. Raha naneho ny heviny i Afrika dia namono tena kosa i Madagasikara. Raha niteny ny rehetra dia nitsaoka izy. Fotoana izao hanitsiana izany fahafaham-baraka izany. Mila mazava ny tena fepetra raisin’i Madagasikara. Tokony hiray feo amin’ny vondrona afrikanina sy ireo mpiaradia aminy ao amin’ny SADC i Madagasikara! Isika no mitarika ny SADC amin’ity taona ity. Tokony ho anilan’ireo vahoaka miady ho an’ny fahafahany sy ny maha izy azy isika. Ny firenena mangiana manoloana tsy rariny dia manitsakitsaka ny maha izy azy sy ny voninahiny. Tsy afaka ny hiaina anatin’izany aloky ny fahanginana izany i Madagasikara, hoy hatrany i Marc Ravalomanana.
J. Mirija