Vonona handray fahefana

Misintona ny taratasy izay nalefany teo aloha ny 08 septambra izay nilaza ny fandavany ny fandraisana ny fahefana tamin’izany, ka nanamafy fa noho ny tsindry sy fandrahonana natao azy dia voatery nanao an’ireny. Lasa olana eo amin’ny firenena ny nandavany izany, ka ho an’ny tombotsoan’ny firenena, hoy izy, dia vonona ny handray ny andraikitra maha Filoham-pirenena mpisolo toerana azy, araka ny taratasy napetrany tao amin’ny HCC omaly. “Io ny lalàna fa ny zava-misy eto amin’ny Firenena no tsy maintsy banjinina, fantatry ny eo anivon’ny HCC izany fa tandindonin-doza ny firenena, miditra amin’ny krizy,… ka mijoro ho Raiamandreny mba hanavotana ny firenena ka anjaran’ny HCC ny mandinika. Ny zavatra katsahintsika, hoy izy, dia ny hisian’ny fifidianana tena madio, ka miantso ny HCC hamaly faran’izay haingana ny tenany. Matoa mametraka an’izao dia maro ny fifampidinihana natao tamin’ny hery politika maro, ary efa mahalala an’io fanapahan-keviny io ny FFKM”, hoy ny ampahan’ny fanazavany. Tetsy andaniny, namoaka fanambarana tsy misy fitombokase ny governemanta iombonana milaza fa mpandainga sy mpanakorontana Atoa Herimanana Razafimahefa. Niparitaka ihany koa moa omaly ny horonam-peo voalaza fa avy amin’ny vadina minisitra iray teo aloha izay amin’ny ambangovangony, dia fikasana hanapoizina hamonoana ity Filohana andrim-panjakana ity amin’ny poizim-boalavo. Matoa aho nandefa ny zanako vavy vao 15 taona ny voalohan’ny septambra teo, dia misy antony, ka aleo atao resaka samy olon-dehibe eo anatrehan’ny filazana fa lainga. Mbola misy sahy miniana fa tsy marina ny nolazaiko, kanefa dia olom-panjakana ambony eto amin’ny firenena no tonga nanery ahy hametra-pialana tsy ho loholona sy tsy ho filohan’ny antenimierandoholona ary efa nofaritana aza hoe: any Allemagne, hoy izy. Ny tenako mihitsy no manelingelina ny sasany ka misy zavatra kononkononina ratsy ao matoa aho manelingelina, hoy hatrany izy. Raha raisina amin’ny fanambaran’Atoa Herimanana Razafimahefa, dia tena nisy ny fanonganam-panjakana na “Coup d’Etat” ary vao mainka mihamafy ny tsindry miantefa amin’ny governemanta napetrak’I Andry Rajoelina izay marihina fa efa hatramin’ny desambra 2022 no tsy marin-toerana noho ny fitsipaham-pitokisan’ny depiote ary io indray no miseho. Hangotraka ity politika ity!
Toky R