Actualités

Notanterahina omaly ihany tao amin’ny Lapan’ny Antenimierandoholona Anosikely ny fanaovam-beloma farany ny nofo mangatsiakany, fotoana teo ambany fitarihan’ny Filohan’ny Antenimierandoholona, Andriamatoa Herimanana Razafimahefa. Anisan’ny nanatrika izany fotoana izany ihany koa ny Minisitry ny fanajariana ny tany sy ny fananan-tany, Atoa Hajo Andrianainarivelo sy ny Solombavambahoaka, Atoa Siteny Randrianasoloniaiko. Teraka tamin’ny 16 Janoary 1962 tao Betioky-Atsimo, izany hoe: feno 60 taona katroka omaly ity loholona nodimandry ity. Manambady aman-janaka izy ; ary voafidy ho Loholon’i Madagasikara tamin’ny anaran’ny Antoko IRMAR nandritra ny fifidianana Loholon’i Madagasikara farany teo. Nahazo diplaoma tao amin’ny Oniversiten’i Fianarantsoa ny tenany ; ary niasa tamin’ny sehatry ny fandraharahana sy tamin’ny sehatr’asa ara-tsosialy maro isan-karazany izay nitazonany andraikitra maro samihafa… Tamin’ny taona 2003 dia nanomboka ny asany amin’ny maha kaomisera jeneraly miadidy ny harena stratejikan’ny Faritanin’i Toliara, avy eo dia mpanolo-tsaina teknika tao amin’ny Antenimierampirenena tamin’ny taona 2004. Nandritra ny taona 2009 dia lasa mpanolo-tsaina teknikan’ny Ministeran’ny fiompiana ary koa mpanolon-tsaina teknika miadidy ny angovo sy ny harena ankibon’ny tany ho an’ny Faritra Atsimo Andrefana izy, raha nisolo tena ny Faritra Atsimo Andrefana tamin’ny foara iraisam-pirenena izay natao tany CARARA Italie. Taorian’izany, tamin’ny 2010, dia lasa “Conseiller de la Transition de Madagascar” (CT) ny tenany. Ara-politika, izy no mpandrindram-paritry ny antoko TGV MAPAR ao amin’ny Faritra Atsimo Andrefana ary mpikambana mpanorina ny TGV ao amin’ny Distrikan’i Toliara-I, Filoham-boninahitry ny FITEA (Fikambanan’ny Teraka Androy) koa izy ary Filohan’ny FIPITO (Fikambanan’ny mpivarotra Toliara). Taorian’ny fanaovam-beloma tetsy amin’ny Antenimierandoholona, dia nentina niazo an’i Toliara tanindrazany ny nofo mangatsiakany. Mirary fiononana feno ho an’ny fianankavian’ny loholona EONGOBELO Jean Marcel isika eto amin’ny Tia Tanindrazana.
Toky R