Any am-ponja indray Ravatomanga

Nalefa any amin’ny fonjan’i Melrose omaly 2 desambra 2025 i Mamy Ravatomanga, izay narahina polisy maro sy tena hary fitaovana ny andron’ny omaly 02 desambra. Io ny fanapahan-kevitra noraisina taorian’ny fitondrana azy tao amin’ny Hôpital psychiatrique Brown Sequard azy nanaovana fitsirihana ara-pahasalamana. Efa nentinatao amin’ny Hopitaly Victoria ihany koa nialohan’ny nametrahana azy tamina efitrana fiandrasana ka natao tsara ambina. Fanapahan-kevitry ny tribonaly ao Port-Louis no nanapaka ny hampidirana am-ponja azy, izay namafisin’ny polisy fa misy ny fiandrasan-draharaha ho an’ny gadra marary ao raha ilaina. Manomboka manenjena sy sosotra ny mpitsara Maorisianina raha halalinina amin’ny fanambarana manodidina ny raharaha Mamy Ravatomanga izay toa efa lasa manana endrika sinema mivezivezy eraky ny hopitaly sy ny fonja. Hentitra ny mpitsara nilaza hoe : « No one is below the law » na « tsy misy olona ambonin’ny lalàna » teo anatrehan’ny mpisolovava an’i Mamy Ravatomanga izay niezaka hatrany ny niady ny hitazonana ity farany amin’ny Hopitaly, hoy ny tatitry ny gazety Maorisianina Defimedia.info. Mihasarotra hatrany noho izany raha halalinina ny toeran’i Mamy Ravatomanga, ary sarotra ny hahafa-bela azy. Miatrika fiampangana vonjimaika noho ny fifanarahana maloto sy tsy ara-dalàna ary koa fiampangana roa momba ny famotsiam-bola i Mamy Ravatomanga, izay tonga tao Maurice tamin’ny alalan’ny sidina fiaramanidina tsy nahazoana alalana ny alin’ny 11 oktobra 2025. Mbola resaka hafa ny fanenjehana iraisam-pirenena toy ny ataon’ny Amerikanina amin’ny raharaha boeing 777.
Toky R