Fampandrosoana ifotony

Kolonely Richard Ratsimandrava, rehefa nitondra 6 andro monja ity firenena ity. Maro ireo raki-tsoratra mitantara sy manombana ny mety ho tena zava-misy marina mikasika ny tena mety ho fomba nahafasan’izany filoham-panjakàna malagasy izany tamin’ny fotoan’androny. Isan’ny nanaitra indrindra tamin’ireny ny nilazàn’ilay mpahaitantara frantsay, Pr Françoise Raison Jourde, fa efa voatifitra na maty tao amin’ny biraon’ny Jeneraly Gilles Andriamahazo, izay isan’ny lehiben’ny etamazaoron’ny tafika tamin’ny fotoan’androny ny Kolonely vao niharahan’ny tifitra nolazaina fa tena nahafaty azy teo Ambohijatovo tamin’izany fotoana izany. Ity jeneraly voalaza teo ity rahateo moa avy eo no nandimby azy nandray ny fitantanana ny firenena tamin’ny alalan’ny fitondràna miaramila ihany nandritry ny 4 volana sy 3 andro, izany hoe, ny 12 febroary hatramin’ny 15 jona 1975, talohan’ny nandaniana ho filohan’ny repoblika ny Capitaine de frégate Didier Ratsiraka. 50 taona aty aoriana, voalaza fa nivalona ny raharaha mikasika ny fomba nahafatesan’ny Kolonely. Nisy ny filazàna tao anatin’ny fitondràna Ravalomanana fa efa fantatra ihany ny tena namono marina izany lehilahy izany saingy aleo hijanona ho tsiambaratelom-panjakana amin’izay. Neverina fa mpitondra isan’ny nanelingelina tandapa maro izy hatramin’ny fotoana naha minisitry ny atitany azy tao anatin’ny fitondràn’ny Jeneraly Gabriel Ramanantsoa noho ny fampandraisany anjara ny olompirenena tanatin’ireo rafitra ifotony izay napetrany toy ny Vatoeka na Vaomieran’ny toekarena sy ny fanomezan-danja ny antsoina hoe «Fokonolona». Teo ihany koa ny fametrahana ny hoe «Raharaha ikambanana» ny raharaha rehetra mahakasika mivantana izany fiainam-pokonolona izany. Isan’ny fanontaniana manitikitika ankehitriny ny hoe mbola manelingelina tandapa maro amin’izao vanim-potoana izao ihany koa ve izany, 50 taona aty aoriana, io resaka fanomezan-danja ny atao hoe fampandrosoana ifotony io na fampandraisana anjara ny eny ifotony amin’ny fampandrosoana an’ity Madagasikara ity?
J. Mirija