Christian Andriatsimiavona “Aleo ny olona adala tsy omem-pahefana…”

miova sata izao tontolo izao, mivimbina siansa sy fitiavana, araka ny fanehoan-kevitra nentin’Atoa Christian Andriatsimiavona isan’ny angady nananana sy vy nahitana ny Sekoly Ambony Fanahy no Olona na SAFO, raha nivahiny tao amin’ny Fandaharana Bemiray an’ny Top Radio FM 102.8 omaly 14 novambra 2022. Tanjon’ny SAFO ny fanabeazana, fibeazana, fanatsarana, fanandratana ny firenena,… ka hananganana fotodrafitrolona hananana olona tsara satria ny fanahy no olona, ary ny no harena voalohany. “Mandroso ny fanatontoloana sy ny teknolojia sy ny fivoaran’ny fiananan’ny zanak’olombelona hanamaivanana ny fahasahiranana. Tsy vitan’ny milina sy ny solosaina kosa ny ara-panahy”, hoy izy. Aminy, diso ivo ny fanjakana ankampobeny, nifandimbiasana io, diso ivo tsy mahazo ilay mari-drefy fanahy no olona, lasa tora-po ny zavatra iainana eto izay miteraka fikorontanana manempotra. Lasa tsy mifampatoky, tsy mifanaja, tsy mifamelona, ka vokany dia mikorontana ny fiarahamonina, sempotra ny olona,… Tsy misy rivo-pihavanana, ka na manao sekoly, làlana, hopitaly,.. aza tsy mahazo sitraka ilay Fanjakana. Miantso firaisan-kiana ny fiangonana, miantso firaisan-kiana ny Filoha fa manino no tsy tafita? Nomarihiny fa mifameno foana ny fotodrafitrasa sy fotodrafitrolona, kanefa tsy misy izany fotodrafitrolona amin’izao fitondrana izao. Ilay mari-drefy maha fanahy tsy iainana sy tsy tafatoetra, fa entin’ilay torapo dia natao haingon-teny sy hoentina hamalifaliana fotsiny hoe: isika Malagasy olon’ny fanahy, tia fihavanana,... hoy Atoa Christian Andriatsimiavona. “Tsy tokony hatao haingo fotsiny io, ary izay no antom-pisian’ny Sekoly Ambony Fanahy no Olona, hanajoro sy hanosika hatrany foana, fa ny olona adala tsy omem-pahefana, ny olona adala tsy hiray hina mihitsy na inona na filazany”, hoy hatrany izy. Ny adala tiana holazaina dia ilay ao anatin’ny mari-drefy tsy mangalatra, ary ny antsika Malagasy dia ny fanahy no olona. Ny olona mifaka amin’ny lohany, ary ny biby tsy manan-doha tsy mandeha. Ny Filoham-pirenena izany dia antsoina hoe: “masoandro”, ka ny Masoandro midika hazavana, fiombonana, fahatsarana, ka rehefa tsy izy mihitsy no miteny hoe: andao isika hitambatra, ity ny fahatsarako, ity ny hazavako, ny tenako tsy mangalatra,… Misy soatoavina sy hasina kanefa tsy tanteraka fa lasa haingon-teny ilay fitambarana. Raha vao diso avy any an-tampony dia mivaralila daholo ka inona tokoa moa ny zavatra tsy hita eto? Kolikoly, fahalovana, tsy misy sehatra tsy ahitana an’izany, lasa manepotra, ka ny zavatra manepotra tsy maintsy soloina “oksizenina”, hoy hatrany Atoa Chriastian Andriatsimiavona. Ny filoham-pirenena, efatra taona izay nitondrana, ka samy mijery isika hoe: inona no zava-misy tao anatin’izany? hoy ny fanontaniany. Eny Andohatanjona Itaosy moa no Misy ny Sekoly Ambony Fanahy no Olona, ka ho an’izay liana dia afaka miantso ny laharana 034 61 856 95.
Toky R