Politique

Ny firesahany hanome vato ho an’ny Filoha ankehitriny Rajoelina fa omena azy ireo ny toeran’ny Praiminisitra sy ao Tsimbazaza ary tokony hahazo minisitera 10 moa no isan’ny niteraka adihevitra. Amin’ny lafiny iray, naneho sy nampiharihary Rtoa Christine Razamahasoa fa mafy sy matanjaka ny faritanin’I Fianarantsoa ka afaka mangataka sy manao tsindry ara-politika hoe: eny ary fa hanohana anao izahay fa izao ny tambiny!? Na izany aza mety fijeriny manokana izay, ary mety aingam-panahy sy fietanam-po nibosesika teo anatrehan’ny fahitana vahoaka an’arivony maro. Tena hanaraka ny toromarika na “cosigne de vote” avy aminy ve anefa ny Mpikamban’ny FIZAFAFI raha ampidirina amin’ny politika sy fifidianana? Olon’ny volomboasary avokoa ve ny mpikambana? Ny sary politika taorian’iny, dia sesilany ny fanenjehana an-dRtoa Christine Razanamahasoa ataon’ny olon’ny fitondrana. Hatramin’ny fampahalalam-baovao mpanohana ny Fanjakana ankehitriny, dia milaza fa norefesin-dRtoa Christine Razamahasoa ny Filoha ankehitriny Andry Rajoelina. Tsy nitsitsy Atoa Soja Jean André na Kaleta Mpanolo-tsaina ara-politikan’ny Filoha nilaza omaly hoe: “Ianareo ihany no manan-doha fa izahay sanana? Toliara izany mahazo minisitra 2, Diego 3, Antananarivo 2, Toamasina 2, kanefa ny governemanta fantatra tsara fa 36? Raha 10 isaky ny faritany 6 dia 60 izany. Mangataka aminao aho madama, aza manao an’io ianao”. Nisy ihany koa depiote IRD tsy nomba ny tenin’ity Filohana andrim-panjakana ity. Hanao ahoana ny toerany ao Tsimbazaza sy ny fifandraisany amin’ny Filoha sy ny ekipany? Tsara ny manamarika fa lany 100% izy tamin’ny fifidianana filohan’ny antenimieram-pirenena izay midika amin’ny lafiny iray fa filohana andrim-panjakana marin-toerana indrindra. Tsy hay anefa ny tsimbadika politika. Taorian’ny depiote Brunelle Razafitsiandraofa izay nataon’ny olon’ny fitondrana sasany maty henjika tamin’ny raharaha Vatovavy-Fitovinany, kere, tifitra, varo-janaka,… dia Rtoa Christine Razamahasoa indray izany izao no isan’ny lasibatra noho ny fijery politikany.
Toky R