Politique

Nanomboka ny 21 febroary no nanaovan’izy ireo an’io, ary kendrena ho tonga 1000 io amin’ity herinandro ity. Manitrikitrika izy ireo fa tamin’ny alàlan’ny hala-bato no nakana ny fahefana, ary ny mba tsy isian’ny korontana no namelana azy hitondra. Ny 28 febroary 2020, niaiky ny fisiana « doublons » amin’ny lisi-pifidianana miisa 1.162.512 ny Filoha lefitry ny CENI, hoy ny RMDM Diaspora. Hitrikitrihan’izy ireo ny fisiana fampidirana fitaovam-piadiana, fony kandida i Andry Rajoelina, kanefa melohin’ny lalàna velona iraisam-pirenena nosoniavin’i Madagasikara, izany toe-javatra izany. Maro ihany koa ny fanitsakitsahana lalàmpanorenana, toy ny fanendrena Governora sy ny saika nanafoanana ny Antenimierandoholona. Tsy voafehy ny fivoahan’ny harem-pirenena, toy ny volamena 73,5kg. Maro ny kolikoly avo lenta, toy ny raharaha « écran plat » mahasaringotra ny minisitry ny Atitany mivady,… Tondron’izy ireo ho fanjakana jadona mpanagadra olona fahatany ihany koa ny Fanjakana Rajoelina, ankoatra ny fanamelohana tamina herisetra niteraka faty olona. Mety hisy akony eo amin’ny sehatra iraisam-pirenena ny fihetsiky ny Malagasy mpila ravinahitra tahaka izao.

Toky R