Politique

Na dia efa manao izay mety aza ny vaomieram-pirenena mahaleo tena misahana ny fifidianana na ny CENI hoy ny filohany Atoa Dama Andrianarisedo omaly dia tokony hiezaka hanatona ihany koa ny vahoaka. Anisan’ireny ny fisoratana anarana anaty lisi-pifidianana vaovao izay efa ao anatin’ny fanavaozana tanteraka isika ho an’ireo feno 18 taona rehetra, ny fikarakarana ny karapanondrom-pirenena izay misy operation mandehandeha mihitsy amin’izao fotoana ho an’ireo mbola tsy manana izany….Izany indrindra no antom-pisian’ilay tetikasa Andao hifidy izay nampahafantarina teny amin’ny Radisson Blu Ambodivoina omaly. Tanjona amin’ity tetikasa ity ny hahafahana mampitombo ny isan’ireo olom-pirenena mandray anjara amin’ny fifidianana karakarain’ny EISA, tohanan’ny USAID. Tanterahina ao anatin’io tetikasa io ny fampahafantarana ny vahoaka ireo fihetsika tokony hatao ao anatin’ny biraom-pifidianana. Toraka izany koa ireo karazana antontan-taratasy tokony entiny ary farany izay tsy kely akory dia ny fandatsahany vato iray ho ana kandida iray tsy misy teritery fa tena vokatry ny safidy. Tonga nanatrika sy nanome vononahitra ny lanonana ireo tompon’andraikitra isan-tsokajiny nahitana solombavambahoaka, filohana fikambanana…Toraka izany koa ireo fiaraha-monim-pirenena izay miezaka miara-miasa amin’ny EISA sy ny CENI amin’ny fanatanterahana izany mba ho fifidianana marina sy mangaraharaha avy amin’ny safidim-pon’ny rehetra tokoa no hisy eto amintsika.
Pati
Legende : Nandritra ny fampahafantarana ny tetikasa « Andao hifidy » teny amin’ny Radisson Blu Ambodivoina omaly