Politique

fa tena feno loharanona krizy sy olana na “foyer de tension” ny sehatra maro. Endrika maneho fa tsy voafehy intsony ny fitantanana ny firenena, eny fa na fampiodinan-draharaha aza efa manahirana tanteraka. Ny andrim-panjakana mikorontana sy mifanongana mivantana na ankolaka raha ny sary niseho sy miseho eo amin’ny governemanta sy ny antenimierampirenena izay efa endrika krizin’andrim-panjakana. Ny niara-dia tao anaty fitondrana tany am-piandohana efa mifanongana ao Tsimbazaza, ary misy ny efa lasa nanangana tarika mpanohitra ivelan’ireo mpanohitra hatrizay. Handalo fifidianana isika, saingy mbola tsy mipetraka ny fitokisan’ny rehetra ny rafitra mpikarakara sy mpitsara ny fifidianana, ary ny governemanta aza toa tsy rototra amin’ny famoahana ny tetiandro mazava. Ny ao anatiny efa nisy nivadika noho ny fahasosorana kanefa mbola manam-potoana ilàna kisa sy hihetraketrahana amin’ny mpanohitra. Mihasarotra ny toeran’i Andry Rajoelina, ary mety ho tahaka ny nidirany teo no ivoahany raha minia mbola hanangam-bovona ao anatin’izao. Niainga tamin’ny herisetra sy ra mandriaka dia ho tahaka izany ihany koa ny tiana hivoahana ny fitondrana ? Ny diplaomasia tsy mandeha amin’izay laoniny, tetezina izao vazan-tany rehetra izao fa tsy hita izay tena vokatra. Ny firenen-kafa mahazo amina miliara dolara, raha tsy hilaza fotsiny an’ilay dia tany Paris ny 21-22 nisian’ny fikaonan-doha iraisam-pirenena momba famatsiam-bola, nahazoan’i Sénégal 2,5 miliara dolara, fa ny antsika serasera no betsaka. Ny Filoham-pirenena malaza ratsy noho ny zom-pirenena vahiny, lasa niteraka fanasokajiana ho mpamadika tanindrazana. Ny olana ato anatiny mitombo ihany. Nirefotra indray ny raharaha QMM any Taolagnaro, izay olana goavana raha sanatria ho tonga amin’ny fanakatonana tanteraka satria isan’ny mitazona ny fahamarinan-toeran’ny vola Malagasy sy ny toekarena izay efa tena mitotongana ambony ambany ny vola vahiny ampidiriny. Ny tontolon’ny fampianarana olana mandavan-taona ka asa izay fanapahan-kevitry ny Sendikan’ny mpampianatra mpikaroka taorian’ny fe-potoana nomeny hatramin’ny 26 jona teo. Ny orinasam-panjakana feno krizy ! Ny Jirama moa olana mandavan-taona tsy mety mivaha, ny Air Madagascar maty tanteraka, dia io fa mangotraka ihany koa ny toe-draharaha ao amin’ny CNaPS taorian’ny nanagadrana ny Tale Jeneraly mpisolo toerana. Manomboka miakatra ny fahasosorana eo anatrehan’ny voalaza fa fanjakazakana sy endrika fanaovana tantely afa-drakotra. Voatonontonona hatramin’ny vadina minisitra iray eo anivon’ny governemanta. Mihamaro ny fahasosorana saingy vao mainka mandrehitra afo ny Fitondrana ka asa izay hiafarany ?
Toky R