Politique

raha ny ambaran’ny depiote sasany. Mitohy izany ny ady eo amin’ny governemanta mpanantanteraka sy ny antenimieram-pirenena. “Efa mihantona sy tsy miasa intsony io governemanta io aminay. Maninona no tsy asaina tsarainay, lany ny fitsipahana dia miala ny governemanta, ary tsy lany dia demokrasia izany. Tsy maintsy hiroso ny “motion de censure”, ary rehefa tsy mety miroso dia andefa fitoriana eny amin’ny Fitsarana avo momba ny lalàmpanorenena. Rehefa tsy hanaiky ny HCC, dia voatery ny Filoha hanala io governemanta io”, hoy ny fanehoan-kevitry ny depiote TIM Todisoa Andriamampandry notaterin’ny fampahalalam-baovao omaly. Toa taratr’izany ilay niraharahian’ny depiote ireo olon’ny mpanantanteraka dia ireo iraky ny Minisiteran’ny serasera sy ny kolontsaina tamin’ilay asam-baomiera mikasika ny volavolan-dalàna momba ny zon’ny mpamorona sy ny artista omaly tao Tsimbazaza. Ankoatra io, ny alakamisy 15 desambra takariva no voalaza fa handaniana ny volavolan-dalàna mifehy ny tetibolam-panjakana. Solombavambahoaka 33 amin’ny 35 no nankato ny fandaharam-potoana. Efa tonga teny Tsimbazaza ny filohan’ny kaomisionin’ny vola, fa tsy tonga kosa ny teknisianin’ny Minisiteran’ny vola. Tsy hisy zava-banona, efa tsy manan-kery intsony aminay maro an’isa io governemanta io, hoy hatrany ny depiote sasany. Ny sasany efa naneho fa fahendrena kokoa ho an’ny Praiminisitra ny mametra-pialana, tao ny naneho fa manohana ny Filoha saingy tsy manohana kosa io governemanta io. Mihalalina izany ny krizy satria toa efa fifampiderana hery no misy eo amin’ny mpanatanteraka sy ny mpanao lalàna, ary efa mifampiandry an-kendritohana.
Toky R