Politique

 Maro moa no manahy, fa hitongilana amin’ny Fitondrana ankehitriny ireo rafitra miantsoroka ny fitantanana sy fitsarana ny fifidianana ireo. Naneho anefa ny Filohan’ny HCC fa tsy miditra amin’izany fa manaraka amin’izay voalazan’ny lalàna. “Raha mikasika ny fanakianana, dia iarahantsika maheno. Tsy manan-kambara izahay ato amin’ny HCC, mijery hoe ara-dalàna sa tsia. Ara-dalàna tsy misy “recours”. Mahaleo ten any CENI, fa hisy ny tolotananay ataonay, tsy hoe ny HCC no hibaiko ny CENI. Mba hamolavolana ny pakiady tsy hampihenana ny halabato”, hoy izy. Tsy nihambahamba moa ny Filohan’ny HCC, fa tahaka ny baolina ihany io, ka indraindray izay resy dia milaza fa mangalatra ny “arbitre” na ny mpitsara. Tena hiezaka tokoa izahay mba tsy haha be resaka intsony mahakasika ny fifidianana, fa hijoro araka ny lalàna sy ny rariny. Mety hisy ny rafitra ikambanana mikasika ny ady amin’ny halabato izay manakoronana, hoy ny Filohan’ny HCC. Ny toky fitaka, fa ny atao no hita, ka dia miandry ny rehetra. Ambony kokoa anefa ny ahiahy noho ny endrika nahatongavan’izy ireo teo amin’ny toerana sy ny fifandraisany amin’ny Filoha sy ny fahefana mpanatanteraka. Ny Filohan’ny HCC dia tsiahivina fa efa minisitra tamin’ny andron-dRajoelina nitondra ny tetezamita, ny Filohan’ny CENI ankehitriny efa avy mpikamban’ny HCC notarihin’Atoa Jean Eric Rakotoarisoa izay nilaza ilay hoe: “azo raisina fa tsy mitombina” ny fitorian’ny mpanohitra. Adihevitra tamin’ireny ny hoe: fitoriana efa ho 700, mpahay lalàna maro, parlemanta maro,… no nandrafitra azy, saingy nolavina avokoa.
Toky R