Governemantan’ny « CV »

taorian’ny fiantsoana fanaterana CV (Curriculum Vitae) ho an’izay teo ho minisitra. Hatolotra ny Filoham-pirenena anio ny tolo-kevitra avy amin’ny Praiminisitra. 256 ny dosien’ireo teo ho minisitra voaray, raha ny antontan’isa azo ny talata teo, raha misy ny vaovao hafa nilaza fa an’arivony, izay mety tafiditra hatramin’ny fangatahana toerana hafa. Tsy ilay isa hoe an-jatony na an’arivony no olana fa ilay hoe manatitra CV mba ho mpikambana ao amin’ny governemanta. Isika eto Madagasikara ihany no ahitana an’izany fa ny an’ny olona vao mirotsaka dia efa mazava ny politikam-pitantanana, ny programa hotanterahana, ny olona hanatanteraka azy,… Fa angaha moa tsy efa niomana hatry ny ela, efa nifampiresaka tamina olona sy ankolafin-kery maro fa izao vao hieriteritra ny hitondra firenena ? Miverina hatrany ny sary efa hatrany amin’ny 2018 nilazana fa niomana 4 taona, saingy na ny fitantanana aza nandeha tamin’ny kitsapatsapatsapa matoa in-dimy tao anatin’ny taom-piasana iray nikitika sy nanova olona teo anivon’ny governemanta, izay midika tsy fahavononana sy kitsapatsaka fa ny nandrombaka fahefana tamin’ny fomba rehetra no nahamaika, ka tsy fahombiazana ny vokany. Nisy minisitera niova minisitra in-dimy, tao ny niova in’efatra, nisy minisitra tsy nahomby tamin’ny toerana hafa dia nafindra tamin’ny toerana hafa, tao ny efa nesorina avy eo naverina amin’ny departemanta hafa. Hatao tsapatsapa vody akoho ka raha tsy tay dia atody araka ilay fomba fiteny ve ? Niainga tany amin’ny fanangonana CV ary hatrany amin’ny fanendrena ambasadaoro aza nanaovana izany ka naharaisana CV 303 kanefa tsy nisy ambasadaoro na iray intsony aza voatendry taorian’ireo dimy notendrena tany ho any amin’ny fiandohan’ny taom-piasana. Hafa raha hoe orinasa, dia tena izay mihitsy no fanao, avoaka amin’ny gazety na amin’ny haino aman-jery na atao peta-drindrina ny filazana hoe mitady mpiasa na mpitantana. Fa ity dia minisitra handrafitra ny governemanta hitantana firenena no safidiana amin’ny alalan’ny fanaterana CV ?
MILA FITOVIAM-PIJERY
Tena politika anefa vao teknika izany toerana minisitra izany, olona mitovy fomba fijery, vina sy firehana politika amin’ilay filoham-pirenena no tokony ho minisitra ; fa tsy hoe teknisianina fotsiny. Avy amin’ny vinan’ilay kandida filoha, voafidy ho filoha no handrafetana ny politika ankapoben’ny fanjakana… tsy maintsy mifangaro ao ny resaka politika sy paikadim-pampandrosoana. Ny olona mpiray antoko na mpiara-dia na mpiara-miombon’antoka amin’ilay Filoha izany no tsy maintsy mandrafitra ny ekipa mpanatanteraka dia ny governemanta. Ka inona ilay antony hoe hanangonana CV ? Sa mba fialana bala fotsiny fa efa vonona ao daholo ihany ny anarana ? Dia vao miha tsy fahaiza-miasa ihany anefa izany satria hampiroaroa saina ny olona mihevitra fa tokony ho izy no nahazo ny toerana kanefa olona hafa mihitsy no indro voatendry. Dia tsy mahagaga raha mihisatra ny fampandrosoana ny firenena, any amin’ny olona handrafitra paikady sy hanapa-kevitra ny amin’ny lalan-kizorana mihitsy no efa olana. Ka raha vao ny fitantanana no olana, tsy misy mandeha amin’izay laoniny ny ambiny. Ny resabe sy fampanantenana ihany koa tsy vao izao no naharenesana azy, toy ny filazana tany amin’ny fiandohan’ny taom-piasana fa tsy handefitra amin’ny kolikoly. Sa tsy kolikoly ny raharaha « bonbon sucette » amina miliara ? Ny raharaha « écran plat », ny volamena nivadika vy tao anaty minisitera , ny tale kabinetran’ny Fiadidian’ny Repoblika voasambotra tany Londres, ny olona voarohirohy tamin’ny fangalaran-tany, ny depiote mampiasa anarana andrim-panjakana amin’ny fitaterana hazo izay harem-pirenena arovana,…
Toky R