Politique

Izay no mahatonga ny vidim-piainana miakatra eto Madagasikara, hoy izy. Mitaraina ho tsy mbola nanao tombom-barotra ny QMM nefa 20 taona izy no teto. Maninona no mbola mijanona? Tsy misy izany hoe orinasa tsy manao tombom-barotra izany na 3 taona aza dia mbola eo. Eto izy no amboariny ny kaontiny fa tsy mivoaka dia misy tombom-barotra. Ry zareo no mametra ny vidin’ny akora fototry ny elmenita any ivelany. Ataony ambany be iny dia eto aminao izy mitomany hoe tsy nahazo tombony. Rehefa mivoaka any ivelany avadika vokatra ireo elmenita ireo dia vola tsy toko tsy forohana. Tokony ahitsy aingana izay lesokantsika voalohany mamatotra amin’ireo Soalala sy QMM sy ny rehetra ireo izay. Tsy tokony akora fototra no ifanarahana fa hoe andao isika hiaraka hitrandraka. Raha hiaraka hitrandraka isika ka hisasaka dia vidio ary ny 50%n’ny tahiry miasa. 70 tapitrisa taonina ny tombana natao tany am-boalohany. Afaka niteny izy tamin’izany hoe vidio ny 35 tapitrisa taonina. Tsy hananany iny vola iny fa tsy tokony alohany dia tenenina fotsiny izy hoe izao ary no hifanarahantsika. Hifanarahana voalohany ny hoe eto no mamadika ireo akora fototra ho vokatra na “produit finis” dia iny no zaraina atsasany avy fa amin’iny fotoana iny dia hesorina amin’ny anjarany ny tokony ho vidin’ilay tahiry tokony ho vidiany fa tsy voavidiny. Lazaina fa mampidi-bola ireo izao kanefa na mampiditra 1 tapitrisa na 10 tapitrisa io tsy misy dikany satria miliara no azony any ivelany. Tsy ny fisian’ny harem-pirenena no mampandroso fa ny fahaizana manao fifanarahana mikasika azy. Raha ny harem-pirenena no mampanan-karena dia efa misy Soalala, Sheritt, QMM sy ny hafa eto nefa maninona isika no mbola mahantra, hoy hatrany ity mpahaitoekarena ity ?
J. Mirija