Politique

Izy no Praiminisitra isan’ny naharitra indrindra, efa talohan’ny fifidianana Filoham-pirenena 2018 no teo rehefa nodidian’ny Fitsarana avo momba ny lalàmpanorenana handrava governemanta ny Fanjakana Rajaonarimampianina noho ny tolon’ny depiote 73, izay nisiana fahafatesan’olona maromaro tamin’ny aprily 2018. Praiminisitra nitantana ny governemantan’ny marimarimaritra niraisina, ary nitantana ihany koa ny vanim-potoanan’ny fifidianana. Adihevitra teo amin’ny IRD izay maro an’isa tamin’izany ny nametrahana azy teo satria olon-kafa toa an-dry Christine Razanamahasoa, Haja André Resampa,… no nokasaina hapetraka, saingy ny anaran’Atoa Ntsay Christian no nipoitra avy tany. Nandà mafy ny IRD ny tolakandron’ny fanendrena, ka tsy maintsy nalamina, ary ny takariva vao nanao fanambarana niraisana. Ny depiote Brunelle Razafitsiandraofa no nitarika izany tamin’izany fotoana, ary izy no olon’ny fitondrana nanakiana mafy ny Praiminisitra tato aoriana. Na maro an’isa eo anivon’ny Antenimiera aza ny IRD, izay nahatonga ny sonia fitsipaham-pitokisana ny governemanta tamin’ny 7 desambra 2022, dia toa ny Filoha no niditra an-tsehatra nampitsahatra izany. Nafana ny valin’ady tamin’ny alalan’ny ampamoaka samihafa namelezana ny antenimieram-pirenena, ary nisy depiote nisesy niakatra tamin’ny haino aman-jerim-panjakana mihitsy. Nalaza ihany koa ny resaka tonta vola!!? Tao anaty governemanta, noahiahiana ho manaokaloka ny toeran’ny Praiminisitra ny Minisitry ny fiarovam-pirenena Jenetraly Rakotonirina Richard. Raha notarafina amin’ny endriky ny governemanta tokoa, raha mijery ny tontolo politika systratejika, ny andraikitra nosahaniny, ny fanomezan’ny Filoham-pirenena fitokisana azy hitazona ninisitera roa (fiarovana sy ny raharaham-bahiny) izay samy minisitera anatin’ny fiandrianam-pirenena, dia isan’ny olona tena nianteherany ny Minisitry ny fiarovana teo aloha, raha toa ka nohozongozonin’ny IRD sasany kosa ny Praiminisitra Ntsay. Nafana ny fanambarana politika nataony sy ny nanomezany toky mafy fa ao an-damosin’ny Filoham-pirenena ny mpitandro filaminana. Fanesorana anefa no setriny, ka na ekena aza fa mety misy toerana hafa hametrahana azy, dia somary nanaitra ny ihany ny nanesorana ity Minisitry ny fiarovana teo aloha Jeneraly Rakotonirina Richard, raha toky politika nataony tamin’ny Filoha. Tombanana avy hatrany fa noho izy heverina ho nanalokaloka ny Praiminisitra Ntsay. Ity farany izay voasokajy hatrany ho olon’ny Fianakaviambe iraisam-pirenena, fa eo ihany koa ny fisiana olona na vondron’olona matanjaka be ao an-damosiny. Tsy ny Praiminisitra Ntsay irery, fa misy minisitra maromaro tsara aro sy toa tsy azo hontsonina mihitsy ihany koa.
Toky R