Politique

Izay lanin'ny maro an'isa eo no hitondra indray ny Firenena ao anatin'ny dimy taona. Efa tafiditra tanteraka amin'ny fotoana mialoha izany fiatrehana ny fifidianana izany i Madagasikara ankehitriny. Mba hisian'ny fifidianana malalaka, ekena, andraisan'ny rehetra anjara sy hisian'ny fitoniana ary hampisehoana ny fahamatoran'ny fanaovana politika eto Madagasikara, nanao tolo-kevitra ny KMF-CNOE, ka nilaza fa aoka izay ny fanaovana mpikaraman'ady politika. Anisan'izany ny fampisehoana fihetsika toa mafana fo amin'ny fanohanana, ny filatsahana ho isan'ny kandida na dia fantatra mialoha fa tsy hihoatra ny telo na dimy isan-jaton' ny vato aza no ho azo. Ny tena tanjona anefa dia ny hivarotana vato sy hahazahoana toerana fotsiny aorian'ny fifidianana. Miantso ny feon'ny fieretreretan'ny mpanao politika, ny mpanohitra sy ny hery afovoany ary ny mpitondra mba hahay hifandamina ka hanolotra kandida roa na telo farafahabetsany izy ireo. Nambara fa sady manakely ny fandaniana io no manatsara ny kalitaom-pifidianana, ary manamora ny safidin’ny olona. Maniry io fikambanana io mba ho kandida vokatry ny marimaritra iraisan'ny isam-pirehana no hirotsaka. Faharoa, mahakasika ny fitakiana ny mangarahara eo amin'ny tombontsoa lazaina fa mihoampampana raisin'ireo mpanao politika eo amin'ny fitondrana kosa, nilaza izy ireo fa tsy misy tsy milaza ary miharihary toa tafika andrefan-tànana fa mahantra ny Malagasy. Mandray vola mihoampampana anefa ny mpanao politika nampindramina fahefana eto Madagasikara. Mitaky ny hamoahan'ireo lehiben'ny andrim-panjakana tombontsoa raisin'izy ireo avy mba ho fantatry ny olompirenena ny KMF-CNOE. Manomboka any amin'ny Filohan'ny Repoblika, mandalo eo amin'ny Governemanta ary ny Antenimierandoholona sy Antenimierampirenena. Mitaky ny hanaovan’ireo olom-boafidy indrindra ireo nampanantena tsy handray karama tatitra ny asa nataony ihany koa. Nsaisin’izy ireo tsindrim-peo ihany koa ny tsy tokony ho fitanilana ara-politikan’ny mpiasam-panjakana na « neutralité des fonctionnaires », ka nahitsy izy ireo nilaza fa natao ho elanelana eo amin’ny mpanapa-kevitra politika fa tsy natao hanompo ny mpanao politika. Nanamafy ny fitakiana ny hamoahana ny tetiandron'ny fifidianana kaominaly ihany koa moa ny KMF-CNOE.
Toky R