Politique

Nihaino ny tenin’ny Filoha teo aloha Hery Rajaonarimampianina amin’ny resaka toekarena sosialy, ary miombon-kevitra fa tsy misy mihitsy ny fahalalahan’ny fandraharahana, tsy mitovy ny fitantanana ny mpandraharaha. Raha azy no manao fandikan-dalàna tsy maninona, fa raha ny hafa mahita faisana, gadraina, tsy voahaja ny zo aman-kasin’ny olona, mba Praiminisitra teo aloha ihany, mba Tale jeneraly ihany,…”, hoy I Marc Ravalomanana, izay voaasa nanotrona ny famelaberana narahina adihevitra nataon’ny Vondrona Panorama, teny amin’ny Carlton Anosy. “Mijoroa hatramin’ny farany, ary tena hanampy anareo mihitsy aho hoe: inona no tokony hijoroantsika, fa vitantsika io. Tsy fahafirin’izay mafy indrindra io ka hoe mamahan-dainga ny vahoaka, koa dia heverinareo fa inona loatra ny Malagasy ka any an-dafy no mitady mpanolon-tsaina, tsy mbola misy firenena eto an-tany ka hoe: banky ny fananantsika. Nahitsy izy nilaza fa tsy hoe mihemotra fotsiny I Madagasikara, fa efa tena ao anaty lavaka. Tokony ho tsapan’ireo mpitondra ireo, tsy manana ilay fahaiza-manao intsony izy hoentina mitantana ilay firenena. Ankoatra izay, naneho ity Filoha teo aloha ity fa mbola vonona hifanandrina amin’ny Filoha am-perin’asa. “Filàna kisa na “provocation” no ataony isan’andro, izaho ataony isan’andro io tsy matahotra azy mihitsy aho, ary fantatro ny “capacité”-ako, fantatro ny zavatra nataoko. Ilay olona tsy mahatanty dia izay daholo no hanaovany azy. Hifanandrina aminy mihitsy aho, ary raha mbola misy hafa ihany koa aza hifanandrina aminay. Inona no atahorana hifanandrina aminy? Mandainga izao!”, hoy I Marc Ravalomanana .

Nanipika kosa anefa izy eo anatrehan’ny fanontaniana hisian’ny fanambaran-kery amin’ny fifidianana fa fifidianana izany mbola ho ela, fa ny hitambaran’ny mpanohitra amin’izao dia ny hoe: tsy mety ny fepetra hoentina mandeha amin’izany fifidianana izany. Tsy misy tsy mahita ary tsy misy tsy mahalala, fa tsy mahaleo tena ny CENI sy ny HCC, fa an’ny fitondrana ankehitriny daholo, ary tonga dia “azo raisina fa tsy mitombina” ny an’ny mpanohitra.

Toky R