Politique

Nirona teny Ambohijatovo izy sy ireo olona notarihiny taorian’ny lanonana ofisialy nataon’ny manamboninahitra. Noho ny fisian’ny zavatra vaovao nolaizain’ny Amiraly Ratsiraka talohan’ny nahafatesany, nilazany ny olona namono an-dRatsimandrava dia misy ny zavatra vaovao. Azo averina izany ny fanadihadiana izay fitakian’ny vahoaka, hoy i Rossy. Momba ny toe-draharaha anatin’ny fitondrana sy ny raharaham-pirenena kosa. Mitombo ny fahasosoran’i Rossy sy ny ekipany amin’ny amin’ny olon’ny fitondrana sasany, izay ambarany fa mandoto sy manaratsy endrika ny Filoha, saingy tsy mahavita miaro azy. Hentitra i Rossy naneho fa mila esorina ireo, ka nitondrany hafatra ho an-dRajoelina. “Namanao aho miteny aminao, misy olona ve ao manery anao ka atahoranao, iray no nofidianay ho Filoham-pirenena dia Andry Nirina Rajoelina. Ny ankoatra izay mialà tao ialahy isany fa aza “amedinareo” ny Filohanay… Aza matahotra fa ireto izahay, fa vao mpitarika fotsiny ireo, fa vonona izahay hiaro anao. Hongoty izay manelingelina anao fa mampimenomenona vahoaka, esory tao. Tena manao ny asany ny mpanohitra, izahay ato amin’ny maro an’isa tena manao ny asanay, fa ireo olona tsy nitolona no lasa ao an-dapa dia izahay no ameriden’ireo”, hoy i Rossy. Tsy misy mpiaro ilay, hoy izy, fa izahay tokony hiaro ahilakilaka, ialahy tsy nitolona tsy naninona fa manao “selfie” erak’I Madagasikara, tsy miakatra “antenne” ialahy miaro azy, izahay tsy avelan’ialahy hiaro azy fa alefan’ialahy any amin’ny mpanohitra. NItondra hafatra ho an’ny miaramila, zandary, admnisitratera sivily I Rossy fa ilain’ny firenena ny tany demokratika misy mpanohitra fa milamina. “Mijoroa ianareo ho eo afovoany manomboka izao, manomboka izao aoka tsy ampiasa zavatra mahafaty, aleo hanao ny mpanohitra, aleo hanao ny maro an’isa, izay manao vinany no samborina fa aza mamono olona”, hoy I Rossy. Tsara ny manamarika fa efa nidina an-dalambe nitaky fialana minisitra I Rossy, ary efa nisy depiote IRD ihany koa tany Bongolova nidina an-dalambe nitaky fialana governora. Naneho fa mbola manohana ny Filoha na atosika any amin’ny mpanohitra aza”, hoy izy. Midika zavatra maro ara-politika ny fampanenoana lakolosy ataon’I Rossy ka asa raha mihaino azy I Andry Rajoelina na tsia satria tsy vao sambany io. Efa manomboka mihamafy ny gidragidra ao anatin’ny Fitondrana satria misy ireo sosotra fa tsy iray monja satria mahatsapa fa ny nisasatra sy ny vely indray no toa hamaivanina ka asa izay hiafarany? Ny fifidianana anefa miha manatona, ny mpanohitra efa mitady izay hevitra handrapahana izao fitondrana izao.
Toky R