Politique

dia toa hafa mihitsy ny sary politika mety hiseho, raha tarafina amin’ny fiainam-pirenena. Azo heverina ho kihon-dàlana hitsimbadihan’ny tantara hikatsahana ny tsara kokoa amin’ny fitantanana firenena ity taona ity, tsy mbola ho taonan’ny fampiesonana manara-penitra sy fialana bala, ary fivadibadihana amin’ny toky sy fampanantenana natao. Misy ny mpanao politika sy vovonana politika efa maneho, fa ho taonan’ny tolom-piavotana ity taona 2023 ity satria ela izay niaretana sy nihafiana izay. Betsaka no milaza mahitsy fa efa ampy izay 10 taona nomena ny Filoha ankehitriny Andry Rajoelina ny Fanjakana volomboasary notarihiny izay, ka rehefa tsy nahay sy tsy nahavita nanaporofo ny fahaiza-mitantana sy mampandroso firenena tao anatin’izany, dia efa tonga amin’ilay fitenenana hoe: “akoho tsy naneno ohatr’izay efa lanin’ny kary”. Efa tsy taonan’ny fampantenana hoe amin’ny 2027-2028 ho tahaka izao sy izao, fa efa fotoana fandrefesana hoe: nandroso sa nihemotra ny firenena taorian’ny fakana fahefana amboletra tamin’ny 2009 hatramin’izao? Nanao ahoana ny fari-piainan’ny vahoaka tamin’izany sy amin’izao? Nanao ahoana ny tao anatin’nyy 4 taona mahery nitantanana nanomboka ny 2019? 7 na 8 volana eo sisa hitantanana ka fahagagana inona no ho hita amin’izany? Ny manahirana mantsy, toa fitanisana olana sy fialana bala tahaka ny krizin’ny coronavirus efa nanomboka tamin’ny 2019 sy ny ady any Ukraine efa ho herintaona latsaka iray volana eo no tanisaina lava fa sakana tamin’ny velirano. Lazaina fa tsy vita iray na roa na telo taona ny fampandrosoana! Fa iza no nilaza fa tsy hampandroso mandrakizay na amin’ny 2060 aza no fiankinan-doha amin’ny mpamatsy vola mahazatra no rehefa misy olana dia ny zava-misy iraisam-pirenena no ialana bala lava? Iza no nilaza fa ny tsy vitan’ny mpitondra nifanesy tao anatin’ny 60 taona hovitainy ao anatin’ny 5 taona? Sarotra ny mbola hiaritra sy hiaina 5 taona indray, ka ity 2023 ity no heverina fa kihon-dàlana ara-politika iray lehibe ahafahana manova hikatsahana ny tsara kokoa, fotoana tokony hahaizana mandray lesona mba tsy ho voafitaka indray satria vidian-dafo ny fahadisoana ara-politika ara-tsafidy amin’ny fametrahana izay olona tena mendrika hitondra firenena sy hitondra fivoarana ho an’I Madagasikara miantraika amin’ny fiaian’ny isam-batan’olona. Raha ny lojika ara-politika, efa naman’ny any ivelan’ny fitondrana ny ila-tongotr’i Andry Rajoelina sy ny volomboasary.
Toky R