Nanome toky ny CENI Hatao fitsirihana ny lisi-pifidianana navaozina

araka ny nambaran’ny Filohan’ny CENI na Vaomieram-pirenena misahana ny fifidianana Atoa Dama Andrianarisedo omaly, nandritra ny fidinana ifotony tetsy Ambohimanarina nanaovana fanentanana ny olona hisoratra anarana anaty lisi-pifidianana. Mba hisian’ny fifampatokisana no nambara fa antony satria ny fanontaniana mipetraka dia hoe: azo antoka ve io lisitra io? Manomboka ny 20 martsa ny OIF no ho tonga eto, ka ho fantatra mialohan’ny 23 martsa ny vokatry ny fitsirihana, raha ny fanazavan’ny Filohan’ny CENI hatrany. Nilaza ihany koa ny CENI fa hisy ny dinika sy fifanakalozan-kevitra iarahany amin’ny mpisehatra ara-pifidianana, handraisan’ny firaisamonim-pirenena, ny mpanao politika, ireo avy amin’ny haino vaky jery ary ireo vondrona sy rafi-piarahamonina samihafa anjara. Mba hananana zotram-pifidianana azo antoka sy mangarahara no nambara fa tanjona. Hatao eto Antananarivo ny 24 martsa 2023 izao izany, ka iantsoan’ny CENI ireo mpisehatra rehetra amin’ny fifidianana, handray anjara amin’ny dinika hifanakalozan-kevitra. Raha nanontanian’ny mpanao gazety mikasika ny ahiahy amin’ny tetibolan’ny fifidianana eo anatrehan’ny filazan’ny Vondrona Eoropeanina fa tsy mbola nisy ny fangatahana nataon’ny governemanta,… dia nilaza ny Filohan’ny CENI fa tsy misy manampanahy ny ara-bola. Efa miroso tsara, hoy izy, ny fifampidinihana eo amin’ny CENI sy ny governemanta amin’ny lafiny tetibola, ka tsy misy mampanahy ny mikasika izay. Momba ny raharaha politika eo anatrehan’ny efa endrika propagandy, anjaran’ny rehetra no mahita hoe: efa misy propagandy ve amin’izao sa tsia ka izany indrindra no isan’ny ilàna fifanakalozan-kevitra, hoy ny Filohan’ny CENI. Mahakasika ny lisi-pifidianana, 13 tapitrisa ny tanjona, 10 tapitrisa mahery eo izy amin’izao, ka andrasana na ho tratra na tsia, fa mbola manana hatramin’ny 31 ma ny olom-pirenena hisoratana anarana. Isan’ny olana ny fahadisoan-kevitra hoe: efa tao anaty lisitra teo aloha, kanefa tsy manan-kery intsony iny, fa tsy maintsy manao fisoratana anarana vaovao, hoy hatrany ny CENI.
Legende : Atoa Dama Andrianarisedo, filohan’ny vaomieram-pirenena mahaleotena misahana ny fifidianana na CENI
Toky R