Paul Rabary “Mirefarefa amin’ny tany loatra ny fanaovana politika eto”

Misy koa ny mahay serasera dia izay tiany ho henon’ny olona ihany no avoitrany, hoy izy. Mirefarefa amin’ny tany loatra ny fanaovana politika eto ka tsy hifaninana ao anatin’izany aho na dia nirotsaka filohan’ny repoblika aza. Nanantena aho mba ho diso 100% ny zavatra noteneniko satria raha izay no zava-nisy dia efa ela no tsy toy izao intsony ny fiainantsika. Tsy ho olona mitady seza mihitsy no hiteny ireny zavatra teneniko ireny. Sarotsarotra ho an’olona mitady seza no hiteny hoe tokony ho foanana ny vatsim-pianarana na “bourse” ho an’ny oniversitem-panjakana, ohatra. Tsy famakafakana natao hamalifaly ny atsy na ny aroa ny famakafakako fa hampahafantatra ny zavatra misy marina. Iriako ho diso daholo aza ny zavatra teneniko. Bokan-trosa i Madagasikara. Lavapiringa aza eto, hoy ny depiote Brunelle Razafitsiandraofa, ilana famatsiam-bola. 70%n’ny vola miasa eto famatsiam-bola. Izany toe-javatra izany ve no mbola antony tsy hiandaniantsika amin’iza na iza amin’io ady atsy Okrainina io? Ny an’ny tandrefana dia na miaraka aminy na tsia. Tsy handefa miaramila hakantsika ireo nosy manodidina ny Rosianina satria ny olany aza tsy hitany ny hanaovany azy. Izany no isany ilazako hoe tsaratsara kokoa ho antsika ny miaraka amin’ny tandrefana. Tsy vita iray andro ny politika sy diplaomasia fa miankina amin’ny tombontsoa na “intérêt” an’ny tsirairay io. Tsy maintsy misy ny sorona na “fusible” anaty fitantanana raharaham-pirenena ka rehefa tsy minisitra io dia na praiminisitra na filoham-pirenena nefa raha ireo roa farany ireo no mitranga dia miongana ianao no dikany, hoy hatrany ny tenany.
J. Mirija