airtel

Politique

31-oct-2022

Politique

Politika kisampontsampona Hanafatra biby kanefa ny eto aza tsy voakarakara

Sample post image

Isan’ny nambaran’ny Filoha ankehitriny Andry Rajoelina nandritra ny famaranana ilay « Forum national des investissements pour l’Emergence de Madagascar » ny sabotsy teo,

31-oct-2022

fa hisy ny fanafoanana na fanalefahan-ketra sy haba amin’ny ho an’ireo mpampiasa vola vonona hanafatra biby manintona tahaka ny girafe, zèbre, elefanta,… mba hampiroboroboana ny fizahantany. Nambara fa vonona sy manoka-baravarana amin’izany ny Fanjakana, ary mbola nohamafisiny ihany koa ny hananganana hotely kintana 5 anaty faritra arovana izay hiantsoany mpampiasa vola. Notsindriany hatrany fa te hahita girafe, zèbre, elefanta eto Madagasikara izy, ary manantena fa hahasintona mpizahatany an-tapitrisany ireo, ao anatin’ilay antsoina hoe : « tourisme de safari et d'aventures » ireo. Tsara kosa ny manamarika etsy ankilany, fa ny eto aza tsy voaaron’ny Fanjakana. Ny ragidro na « lémurien » izay voalohany mampiavaka an’i Madagasikara sy isan’ny tena mandrisika ny vahiny ho tonga aty, niaraha-nahalala fa manodidina ny 12 no ripaka matin’ny raboka vao tsy ela tao Tsimbazaza. Miha mitsipozipozy sy tsy voakarakara ny valanjavaboaharintsika ka sao ireo aloha no mila atao tsara karakara. Ny any amin’ny faritra arovana, maro no ripaky ny fihazana sy ny doro tanety.Ilaina ny biby vahiny hisintonana olona, saingy mila jerena ny ato anatiny izay ahiana ho lany tamingana. Raha hijery ireo karazam-biby vahiny tanisain-dRajoelina ireo no tena anton-dian’ny vazaha mpizahatany, dia tsy I Madagasikara mihitsy no ho laharana voalohan’ny safidiny fa ny firenena tena fihaviany. Any Kenya, Afrika atsimo, Namibie, Zimbabwe efa henjana be ary efa lasa lavitra ny resaka safari. Elefanta ve no hanintona azy kokoa noho ny ragidrontsika tsy hananan’ny hafa ka tokony hokarakaraina? Matoa ireny biby ireny tsy nataon’Andriamanitra teto dia misy antony ka asa hoe: mba nosaininy ihany ve izany sa dia efa mandeha ho azy tahaka ny hoe: asiantsika Miami tahaka ny any Etazonia eto amintsika, avy eo rehefa tsy tanteraka dia lalaovina any amin’ny voambolana. Tsy vao izao ity milaza hanafatra an’izao sy izao ity, hany ka ny fanafarana vary aza nisy fotoana nireharehana ho fampandrosoana satria ny eto nolazaina fa roa taona vao miakatra ny vary. Vao noresahana teo ihany koa fa hanafatra mpampianatra vahiny hampianatra ny tanora Malagasy. Ilaina ireny, saingy ny fanomezana lanja an’ilay hoe: hanafatra ho ambony ny zava-drehetra mihitsy no toa hafahafa.
Toky R
 

Dans la même rubrique

12-avril-2024

Lasibatry ny teti-dratsy politika maloto mba tsy hisian’ny kandida afatsy kandidam-panjakana tao Sambava

Card image cap
12-avril-2024

Mivarahontsana isika satria tena sahirana tanteraka ny firenena kanefa misy mpitantana.

Card image cap
12-avril-2024

Tsy mbola niova ny fahitan’ny antoko politika Fiombonana ny fifidianana eto Madagasikara,

Card image cap
12-avril-2024

Taorian’ny fifidianana Filoham-pirenena farany teo no efa nanomboka nivoaka ny resaka sy ny feo,

Card image cap
12-avril-2024

Notsikafonin’ny Firaisamonim-pirenena heveriny fa didy jadona sy fanitsakitsahana ny :

Card image cap
12-avril-2024

Natolotra ofisialy ny alarobia 10 aprily teo teny Alasora ny lisitry ny kandida tarihin’ny Depiote Gerry Randriambolaina

Card image cap