Politique

 Na nohozongozonina niainga tany amin'ny 2014 nitondrany hatramin'ny taona 2018 nialany aza, mba nahavita namerina ny fitokisan'ny sehatra Iraisam-pirenena satria firenena voasazy isika nialohan'izany noho ny fanonganam-panjakana. Nijery lavitra ihany Rajaonarimampianina raha tarafina amin'ireo tetikasa goavana mitohy mandrak'ankehitriny, izay misy ny efa vita notokanan-dRajoelina, toy ny lalana Rocade-Est mampitohy an'i Marais Masay sy By Pass, ny lalana RN5A Ambilobe -Vohémar,... Tahaka izany ihany koa I Marc Ravalomanana, nametraka ho isan’ny teny faneva mihitsy hoe: “Amboary ny làlana eto Madagasikara”, saingy novoizina sy nanaovana eson-teny tamin’izany hoe: làlana angaha azo hoanina? Taona maro aty aoriana, hafa ny firesaka ary milaza hanamboatra làlana 6800km hatramin’ny 10800km mandritra ny enina taona manaraka. Ny fanontaniana mipetraka hatrany kosa dia ny hoe: raha tena nanana traikefa tamin’izany, tsy niandry dimy taona manaraka, fa efa natomboka tao anatin’izao fe-potoana iasana izao izany fa tsy aty amin’ny herintaona tsy haharavan’ny tsena vao hanao an’izatsy sy izaroa? Iza no hamatsy vola satria ny hafa matoa nahavita ireny dia natokisan’ny olona, marin-toerana ny diplaoamasia, nisy ihany ny Fanjakana tsara tantana,… Ho an’ny sahatra hafa, ny resaka fanafoanana ny delestazy lazain-dRajoelina fa hitontona amin'ny 2027-2028 dia saika mbola ireo tetikasa natombok'i Hery Rajaonarimampianina ihany koa no hahavaha izany tahaka an’i Sahofika izay hahavokatra hatrany amin'ny 200MW, Volabe 120MW,.. Nampanantena 400MW Rajoelina tamin’ny propagandy, mbola nampanantena 652MW indray hatramin’ny 2028, saingy rehetra zohiana dia ireo tetikasa natomboky ny Fanjakana teo aloha.
FITANTANANA ORINASAM-PANJAKANA
Ny 28 oktobra 2022 teo, vaky vava I Andry Rajoelina fa tapitra banky ropitra sy mitsipozipozy ny ankamaroan’ny orinasam-panjakana tantanan’ny Malagasy ka isan’ny noresahiny ny Jirama sy ny Air Madagascar. Natao maty henjika I Marc Ravalomanana raha niara-niasa tamin’ny Alemà tamin’ny alalan’ny orinasa Lameyer, ary tahaka izany ihany koa ny ny Lufthansa izay niara-niasa tamin’ny Air Madagascar. Aiza ho aiza ny taloha sy ny ankehitriny? Nihemotra isika sa nandroso? Nanao ahoana ny Kaompania Air Madagascar talohan’ny fanonganam-panjakana 2009 dia aiza izy izao? Rehefa zohiana, toa miaiky ihany ankehitriny fa marina sy mitombina ny politika nataon’ny teo aloha tamin’ny resaka angovo, làlana,… Sarotra anefa ny hiaiky izany, lavitry ny fahintsiana, toa tsy mba manana ilay antsoina hoe: “honnêteté intellectuelle”, faly nanenjika ny hafa kanefa toa ny nataon’ireny ihany no ankamaroan’ny mbola ireharehana, ary ny politikan’ireny no atao “kopikole” hakana fom-bahoaka. Rehefa ny hafa no miteny dia vorondolo, fa rehefa izy dia voromanga hatrany kanefa raha ny vokatra amin’ny fiainam-bahoaka, ny azy no toa nandetika firenena indrindra tao anatin’ny 60 taona .
Toky R