Politique

Tokony iomanana foana izany, hoy izy. Ny main-tany, orana, fivoahan-drano, fako, kere… samy efa ao anatin’ny tokony iomanana izany fa ilay fialana andraikitra toy ny ataon’ny praiminisitra ny amin’ilay hoe manana 600 miliara Ariary ilay fanjakana avy amin’ny “Fonds routier” na tetibola momba ny lalana dia aiza ary? Izy ihany no mamatotra ny tenany. Tsy alohanao ny volan’ny mpikojakoja lalana. Fantatrao ny lalana fa avokavoka, lalan-dra mampifandray ilay firenena. Mampifandray ny vahoaka amin’ny fifanakalozana entana, varotra, vola. Ankoatran’ny tsy fikojakojana, ny tsy fandoavana ny volan’ny orinasa sy ny mpandraharaha dia mandainga ilay praiminisitra efa tsy ankatoavina na “légitime” intsony. Na inona sakana nataon’ny filoham-pirenena ho fampitsaharana ireny fitsipaham-pitokisana na “motion de censure” ireny dia aminay efa tsy praiminisitra intsony ianao andriamatoa Ntsay Christian. Efa tsy minisitra intsony ireo rehetra ireo. Mifikitra mafy amin’ilay toerana ianao nefa raha oharina amin’ny baolina kitra ilay izy dia efa nahazo karatra mena ianao fa tsy mety mivoaka ny kianja. Ny ary ambonimbony ary mbola miteny ny mpitsara hoe ampidiro indray iny nefa ianao adisoana goavana. Efa hita fa tsy misy vola ilay fanjakana. Tsy ny nahasoa no natao fa ny nahafinaritra dia lany ny paiso an-kady. Efa tsy nisy tsy vaky vava. Isany ny FFKM. Isan’ny koa ny tenin’ny masoivoho frantsay hoe mila fanomanana tsara ny fifidianana. Tsy mijabaka izahay. Voahaja marina ve ilay fitsipika demokratika? Ny mangarahara anaty fifidianana? Tsia avy hatrany ny valiny satria ny fanomanana aotra. Diso tanteraka ny tombana. Efa nitarina tamin’ity volana ity hoe 13.500.000 isa no tanjona. Tsy ampy herinandro sisa nefa mbola tsy ampy 9.000.000 izao no voaisa ao. Tsy mahay ilay mpanao tombana, CENI, tsy mahafehy ny asany ilay mpitondra fanjakana. Lainga, fitaka, tsy fahaiza-mitantana no eto. Efa manomboka mandray andraikitra sy mijoro amin’ny fahamarinana sy ara-drariny izao ny fitsarana. Hita teto amin’ny boriboritany fahadimy izany. Tsy misy maniry korontana eto fa ireto mpitondra mamitaka sy mandainga ireto no ho fototry ny olana raha hoavy ny olana eto amin’ity firenena ity. Avy amin’ny mpitondra no antony raha misy ny korontana eto, hoy hatrany ny tenany.
J. Mirija