Politique

Soalihy Moussa. Mba tiako raha vao nanomboka ity fotoam-piasana ity izy no niteny an’iny, hoy izy. Nanana ny anjara toerany foana ary nanongana ny fitondrana hatramin’izay tokoa izany Norbert Lala Ratsirahonana izany. Misy fomba fiteny izay anefa hoe “Le monde change, le monde évolue”. Matetika koa diso vanim-potoana ireo raiamandrenintsika izay efa lehibebe ireo. Teraka ny taona 1938, izany hoe , 84 ho 85 taona izany filohan’ny AVI izany raha tsy diso aho. Hafa ny sokajin-taona amin’izao. Mila fanovana fanaovana politika mihitsy satria ny andron’izany Norbert Lala Ratsirahonana izany mbola tsy nisy Facebook. Mbola tsy niroborobo ny tekinolojia. Mbola andairana resaka miely. Lojika izy raha miteny hoe niongana izay nialany satria tena nilalao ity politika ity ary mbola andrarezina tamin’ny politika. Izahay sokajin-taona ankehitriny kosa tsy miombon-kevitra loatra amina zavatra ohatran’izany intsony. Na ny fifandanjan-kery iraisampirenena aza izao efa miova ary misy zavatra efa miova be dia be. Mangataka ny AVI hiala ary dia ho hitantsika eo. Ny tena mampalahelo dia herintaona mialoha fifidianana toy izao no ahitana ny tena namana na izay tena vonona sy resy lahatra amin’ilay fitondram-panjakana. Mivoaka daholo ny haratsiam-panahin’ny mpanao politika. Ry Hajo izao sakaizan’ny mpandresy. Tsy mitaingina soavaly maty. Teo koa ny raharahan’ny minisitry ny raharaham-bahiny izay nanapa-kevitra tsy nifampierana. Efa misy tsy fifampatokisana intsony ao dia misandratra ho azy ny taranak’I Rasanjy. Tokony ho tonga saina ny filoham-pirenena handrefy hoe iza no tena namany? Raha adika amin’ny tenin-jatovo ny ataon’ny filohan’ny AVI dia manao fikan’antitra. Fanajabahana ny filoham-pirenena ny filazana fa tsy tokony handrava governemanta amin’izao ny filoham-pirenena. Sakananao izany ny zon’ny filoham-pirenena hanao tombana ny governemantany. Ny tena mpanao politika dia mahalala tsara fa tsy mahafa-po io governemanta io raha hitantana fifidianana. Efa nilaza aho fa na io toerana misy ny minisitry ny asam-panjakana izay vadin’ny filohan’ny CENI io dia efa tsy mety fa mamparefo ny fitondrana. Filaminana no tadiavina izao, hoy hatrany ny tenany, ka sao dia mba tokony hipetrapetraka sy hisotro ronono amin’izay I Ratsirahonana fa efa tsy mandaitra intsony ny fika masiso fanaony taloha ?

J. Mirija